Ginpangabay sang defense team ni Vice President Sara Duterte nga usisaon sang senate impeachment court ang posible nga paglapas sang prosecution team sa sub judice rule.
Suno kay Defense Spokesperson Atty. Michael Poa , ini ang angot sa ginbuy-an nga pahayag sang prosecution sa media, partikular ang pagkwestyon sa kredibilidad sang mga testigo sang depensa kag sa kabug-aton sang ila mga testimonya, nga mahimo sakop sang sub judice rule.
Apang, pahayag niya, gusto anay sang depensa nga hatagan sang kahigayunan ang prosecution nga magpaathag sang ila bahin bangod mahimo nga may rason ang mga ini sa ila mga nangin pahayag.
Ginpakigbahin man ni Poa nga bilang spokesperson, naintindihan sini ang kabudlay sa pag-atubang sa media ilabi na ang sitwasyon nga kis-a mabudlay likawan ang pagkomento sa mga isyu nga sakop sang sub judice rule.
Dugang pa niya, bisan may pagduha-duha siya sa pagdala sang amo nga isyu sa impeachment court, importante nga mabatian man ang bahin sang prosecution antes magdesisyon ang korte.
Matandaan nga una na ginpahayag ni defense counsel Sheila Sison nga naglapaw na sa patas na komentaryo ang mga pahayag sang mga prosecutor bangud ginkuwestiyon sang mga ini ang kredibilidad sang ila mga testigo.
Nahibaluan man nga sa nauna nga ruling ni Presiding officer Chiz Escudero, ang mga partido nga naglapas sa sub judice rule ang mangatubang sang admonition sa first offense, P30,000 fine kag limitations sa paghambal sa korte sa second offense, kag posible nga pagkakas sa amo nga indibidwal sa proceedings sa third offense.
