Nagpahanumdom ang Iloilo Provincial Health Office (IPHO) sa publiko nga hatagan sang espesyal nga proteksyon ang mga vulnerable group ukon mga grupo nga mas delikado nga makaeksperyensya sang kumplikasyon sa ikaayong-lawas bangud sang tuman nga kainit dala sang Super El Niño.
Sa interview sang Bombo Radyo kay Dr. Rodney Labis, Chief sang Health Service Delivery Division sang IPHO, iya ginpahayag nga lakip sa dapat hatagan sang atensyon amo ang mga kabataan, senior citizens, mga nagabusong kag mga indibidwal nga may yara sang chronic illnesses.
Gina-abisuhan ang mga makaeksperyensya sang bisan ano nga sintomas nga magpakonsulta gilayon agud mahatagan sang nagakaigo nga pagbulong kag atensyon medikal.
Ginpahanumdom man ang mga may diabetes kag hypertension nga padayon nga mag-inom sang ila mga bulong kag magpakonsulta sa doktor.
Samtang, ginapangabay man sa publiko nga siguruhon nga matinlo kag may takop ang mga suludlan sang tubig agud malikawan ang kontaminasyon kag pagpamugad sang mga lamok.
Bisan pa ginapaabot ang malawig nga tig-ilinit, ginpahanumdom sang IPHO nga padayon nga sundon ang mga pamaagi agud malikawan ang dengue paagi sa pag-check sang mga lugar nga mahimo pamugaran sang mga lamok.
Ginpahanumdom man sa publiko nga sundon ang 4S strategy sang Department of Health nga amo ang: Search and destroy breeding sites, Secure self-protection, Seek early consultation kag Support fogging or spraying sa mga lugar nga nagadamo ang kaso sang dengue.
Nahibaluan nga sa latest update sang Philippine Atmospheric, Geophysical and Astronomical Services Administration (PAGASA), yara na sa tropical Pacific ang “very strong El Nino”, ginapaabot nga maga-peak sa katapusan sang tuig, kag padayon nga mabatyagan ang epekto tubtub sa tunga-tunga sang 2027.#
