Nagpaandam ang Iloilo Provincial Health Office (IPHO) sa posibilidad nga magdamo ang kaso sang dehydration, mga balatian bangud sa sobra nga kainit sang panahon, kag mga makalalaton nga balatian bangud sa ginaeksperyensya nga Super El Niño.
Lakip man sa namensyonar sang talatapan amo ang diarrhea kag malnutrition.
Sa interview sang Bombo Radyo kay Dr. Rodney Labis, Chief sang Health Service Delivery Division sang opisina, iya ginpahayag nga kinahanglan nga palig-unon sang mga residente kag local government units ukon LGUs ang ila pagpanghanda agud malikawan ang posible nga malain nga epekto sang amo nga weather phenomenon.
Ginpahanumdom ni Labis sa publiko nga mag-inom sang bastante nga matinlo kag safe nga tubig sa bug-os nga adlaw, ilabi na sa mga nagatrabaho ukon may mga hilikuton sa guwa sang ila balay.
Ginapanugyan man sa residente nga likawan ang malawig nga pagbulad sa idalom sang init sang adlaw ilabi na sa mga oras nga mabaskog ang init.
Kun mahimo suno kay Labis, himuon ang mga ulubrahon sa guwa sa aga lamang ukon sa hapon.
Gina-engganyo man ang pagsuksok sang komportable nga panapton kag ang regular nga pagpahuway sa mga lugar nga may landong.
Suno sa opisina, lakip sa mga sintomas sang balatian bangud sa sobra nga kainit amo ang pagkalipong, pagsuka kag pagsakit sang tiyan.
Samtang ang kombulsyon naman kag ang sobra nga pagtulo sang laway mahimo nga senyales sang heat stroke nga nagakinahanglan sang gilayon nga atensyon.
Sa tunga naman sang posibilidad nga magkulang ang suplay sang tubig, ginpahanumdom sa mga panimalay nga magkinot sa paggamit sini apang siguruhon nga may bastante nga tubig para sa pag-inom, pagluto kag personal hygiene.
Suno sa health office, kinahanglan gid ang paghugas sang kamot, malimpyo nga pagpreparar sang pagkaon kag pagmintinar sang kalimpyo sa palibot agud makalikaw sa diarrhea kag iban pa nga makalalaton nga balatian.
Ginaabisuhan man ang may yara sang mga balatian nga magpadayon sa pag-inom sang prescribed medications kag magpakonsulta gid sa health care providers kun kinahanglanon.
Nahibaluan nga sa latest update sang Philippine Atmospheric, Geophysical and Astronomical Services Administration (PAGASA), yara na sa tropical Pacific ang “very strong El Nino”, ginapaabot nga maga-peak sa katapusan sang tuig, kag padayon nga mabatyagan ang epekto tubtub sa tunga-tunga sang 2027.#
