Ginapanindugan sang hepe sang Dueñas Municipal Police Station nga mabaskog ang ila ebidensya batok sa ginatudlo nga suspek sa pagpangluthang-patay sa isa ka manager sang lending company sa Barangay Ponong Grande, Dueñas, Iloilo sang Myerkules, Nobyembre 4.
Ang biktima amo si alias Roy, 36-anyos, residente sang Barangay Man-it, Passi City.
Ang nadakpan naman nga isa sa duha ka suspek amo si alias Bong-Bong, 50-anyos, residente naman sang Brgy. Sablogon, Passi City.
Napasakaan na si Bongbong kag ang isa ka John Doe sang panumbungon nga murder kaangot sa amo nga insidente.
Sandig sa pulis, si BongBong amo ang driver sang motorsiklo sang gintiro ang biktima.
Sa interview sang Bombo Radyo kay Police Captain Isagani Tabares, ang hepe sang Dueñas Municipal Police Station, iya ginpahayag nga magluwas sa backtracking nga ila ginhimo, may duha ka mga witnesses nga amo ang positibo nga nag-identify kay alias Bongbong.
Padayon sa pagpanginwala ang suspek nga may kaangtanan ini sa insidente, apang suno sa hepe, nagaguwa sa ila nga imbestigasyon nga work-related kag posible nga personal grudge ang rason sang pagpangluthang.
Santo sa imbestigasyon suno kay Tabares, naghalin si alias Roy sa ila balay sa Man-it samtang nagasakay sa motorsiklo kag padulong kuntani sa banwa sang Dingle.
Sang nakalabay sa Brgy. Ponong Grande, naghinay-hinay ini bangud may naagyan ini nga aksidente sa dalan apang didto kag gintiro ini sang riding-in-tandem suspects.
Ginbawian sang kabuhi ang biktima bangud sang multiple gun shot wounds lakip na sa iya nga liog, tiil kag iban pa nga parte sang lawas.
Pito ka empty shells sang ginapatihan nga .45 caliber pistol ang na-recover sa crime scene.
‘INOSENTE AKO’
Todo panindugan naman si alias Bongbong nga wala siya sang hinalung-ong sa hitabo.
Pahayag sini, sang natabo ang insidente sang Myerkules, yara siya sa ila nga balay sa Sablogon kag nagapang-gahit sang iya nga garden.
Dugang sini, ara mismo ang iya bata, tiya, kag ginikanan nga makapamatuod nga wala siya nakahalin sa ila nga balay.
May tattoo sa iya butkon si Alias Bongbong, kag isa ini sa gusto sini nga maklaro sa pulis kun nagasibo ang iya butkon sa butkon sang amo nga suspek, kun basehan ang CCTV footage.#
