Pasakaan sang panumbungon nga murder ang isa ka 37-anyos nga suspek nga nagluthang-patay sa 19-anyos nga lalaki sa Sara Road, Barangay Poblacion Ilawod, Passi City.
Ang suspek amo si alias Ernie, tumandok sang Barangay Alimono, apang nagatiner sa Población Ilawod; samtang ang napatay naman amo si alias Ronel, tumandok sang Magdungao, apang nagatiner man sa barangay nga gintabuan sang insidente.
Sa interview sang Bombo Radyo kay Police Lieutenant Colonel Peter John Pisueña, hepe sang Passi City Police Station, iya ginpahayag nga ginapreparar sang opisina ang complaint kag posible i-file bwas, Nobyembre 3.
Nagapabilin naman sa ila kustodiya ang suspek matapos ini nga ginsungka sang iya pamilya.
Kun balikan, natabo ang insidente sang Sabado, Oktubre 31, pasado alas nueve sa gab-i.
Sandig sa pulis, naglabay ang duha ka anak sang suspek nga lunsay menor de edad sa lugar kun sa diin naga-inum-inom ang biktima kag ang iya mga abyan.
Ginpahayag nga may baisay nga natabo kag sang ulihi, nagresulta sa paghabuyanay sang botelya.
Gilayon nga nagpanugid ang mag-utod sa ila nga amay; kag sang nag-upod na ang ila amay pabalik sa area, may dala na ini nga pusil kag nagsinggit kun sin-o ang kontra sang iya mga bata.
Sang nakit-an sini ang biktima, ginluthang niya ini, naigu sa ibabaw nga parte sang hawak, kag ginbawian sang kabuhi.
Base pa sa pulis, nagbulig pa ang mag-utod nga menor de edad sa pagsakit sa biktima samtang nga nagapalagyo ang ila nga amay.
Ginapatihan nga 12 gauge homemade shotgun ang gin-gamit sang suspek sandig sa na-recover nga bala, apang wala na ini na-recover gikan sa iya.#
