Patay ang 15-anyos nga estudyante samtang pilason naman duwa pa ka indibidwal matapos ginluthang sang wala pa makilal-an nga suspek samtang nagapapuli ang mga ini halin sa isa ka concert.
Natabo ang insidente kaagahon subong nga adlaw sang Sabado, Oktubre 24, sa Talacogon, Agusan del Sur.
Suno sa Agusan del Sur Police Provincial Office, dead on arrival sa ospital ang 15-anyos nga biktima bangud sa igo sang bala.
Pilason naman ang 23-anyos kag ang 13-anyos nga estudyante nga gindala sa malapit nga ospital para sa pagbulong.
Base sa pauna nga imbestigasyon, pabalik na kuntani sa ila tagsa ka balay ang mga estudyante sang natabo ang pagpangluthang.
Gilayon naman nga nakapalagyo ang mga suspek.
Naglunsyar naman sang hot pursuit operation ang Talacogon Municipal Police Station kag nakig-angot sa mga kaiping nga police stations kag sa Armed Forces of the Philippines.
Ini agud mapunggan ang possible nga ruta nga paga-agyan sang mga suspek.
Padayon naman ang imbestigasyon sang mga awtoridad.
