Ginkumpirma ni Dr. Darel Tabuada, Provincial Veterinarian nga wala sang accredited slaughterhouse sang National Meat Inspection Service (NMIS) sa Iloilo.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga regular nga nagalibot ang mga personnel sang Provincial Meat Inspection Services (PMIS) sa mga merkado agud usisaon ang kalidad sang karne kag ang mga dokumento sini.
Nahibaluan nga isa sa ginapangita sa mga nagabaligya amo ang Meat Inspection Certificate nga nagapamatuod nga ang karne naghalin sa slaughterhouse kag nakaagi sa nagakaigo nga meat inspection.
Ginapanugyan ni Tabuada ang mga konsumidor nga lantawon kun may yara sang Meat Inspection Certificate ang vendor antes magbakal sang karne.
Samtang, ang National Meat Inspection Service (NMIS) may enforcement team nga nagapatigayon sang operations sa mga lugar nga may report tuhoy sa hot meat ukon karne nga gin-ihaw nga wala nagsunod sa nagakaigo nga proseso.
Ang NMIS may nagkalain-lain nga classification sang slaughterhouse suno sa ila compliance sa mga kinahanglanon nga pasilidad, equipment, sanitation kag operasyon.
Ang Class A nga slaughterhouse mahimo makasuplay sang karne sa lokal nga lugar, suno sa nagakaigo nga accreditation kag regulasyon.
Ang Class AA nga slaughterhouse mahimo makasuplay sang karne sa nagkalain-lain nga lugar sa Pilipinas.
Ang Class AAA amo ang classification para sa slaughterhouse nga makasuplay sang karne sa domestic market kag export market, sa diin dapat masunod ang dugang nga requirements para sa export.
May mga slaughterhouse sa Iloilo nga nakapasar sa Double AA ang sturcture kaangay sang iya sang Iloilo City, Oton, Miagao, San Joaquin kag iban pa nga lugar.
Apang, na downgrade ini bangud wala ma-meet ang iban nga requirements nga kinahanglanon sang NMIS.
Lakip sa mga kinahanglanon nga dapat masunod amo ang kompleto nga equipment, bastante nga manpower kag husto nga operasyon sang slaughterhouse.
Apang nagapanikasog man ang provincial government kag ang mga Local Government Unit (LGU) nga masunod ang mga kinahanglanon agud makakuha sang NMIS accreditation ang mga slaughterhouse
Ginpasalig ni Tabuada nga padayon ang pag-monitor sa mga locally registered meat establishments agud masiguro nga ginapatuman ang nagakaigo nga meat inspection kag food safety measures.
Ang locally registered meat establishment amo ang pasilidad nga rehistrado sang local government kag ginasiguro nga safe kag matinlo ang mga baboy.
Text by: Bombo Lynd-C Bade
