Nag-upod sa tatlo ka adlaw nga “pork holiday” ang 25 ka mga asosasyon sang backyard hog raisers sa Negros Occidental.
Ini nga paghulag ang kasunod sang panawagan sang Agricultural Sector Alliance of the Philippines (AGAP) agud magprotesta batok sa daku nga kapierdihan bangod sang import policies kag pagsaka sang production cost.
Suno kay Ric Lauron, presidente sang Alliance of Hog Raisers Association of Negros Occidental (AHRANO), naapektuhan sang manubo nga farmgate prices kag mataas nga input costs ang mga hog raisers.
Dugang pa ni Lauron, kadungan sang protesta nga naghalin sang Huwebes tubtub subong nga Sabado, paga-untaton ang pagbaligya sang baboy kag pag-deliver sa mga merkado.
Suno sa iya, 25 sa ila nga member associations ang nag-upod sa hublag-protesta agud nga iduso sa national government ilabi na sa Department of Agriculture (DA) nga masabat ang ila problema kag maghatag sang madasig nga suporta.
Kaangot sa nasambit nga protesta, mga 200-300 ka mga baboy ang ginapunggan nga igadeliver sa bug-os nga probinsya sa sulod sang tatlo ka adlaw.
