Gindeklarar ang state of calamity sa Passi City bangud sa pag-atake sang Red-Striped Soft Scale Insect (RSSI) sa mga tanom nga tubo kag bangud sa daku nga epekto sini sa mga mangunguma.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga sa 51 ka mga barangay sa syudad kun sa diin may tanum nga tubo, 49 gid ang apektado.
Nagalab-ot man sa 3,300 ka ektarya sang katubuhan ang gin-igu sang amo nga peste.
Suno pa sa alkalde, bangud sa infestation, apektado ang palangabuhian sang 3,136 ka mga mangunguma.
Bangud sa lapnagon nga damage, ginpasar sang City Council ang Resolution No. 2026-179 para sa deklarasyon sang state of calamity.
Ginpasalig ni Mayor Palmares nga padayon ang koordinasyon sang local government unit sa Department of Agriculture (DA), Sugar Regulatory Administration (SRA), Iloilo Provincial Government, kag iban pa nga mga ahensya sang gobyerno para mapabaskog pa ang monitoring kag pagtapna sang peste.
Nahibaluan nga sa lebel pa lamang sang syudad, may gina-conduct na nga RSSI information drive sa lain-lain nga mga barangay para nga matudluan ang mga mangunguma kun paano matumod nga may RSSI, paano ini malikawan, kag kun paano papason.
Ang RSSI nagakaon ukon nagasuyop sang katas sang tubo kag mahimo makapanubo sa produksyon.
Suno sa SRA, ang honeydew ukon matam-is nga likido nga ginapagwa sang amo nga insekto nagapadamo sang amag sa mga dahon kag nagapugong sa husto nga photosynthesis.
Una nga nadiskubrehan ang amo nga peste sa Pilipinas sang 2022. Halin sadto, nangin isa ini sa pinaka-seryoso nga pamahog sa lokal nga industriya sang tubo.
Kun tuman gid ang infestation, tubtub katunga ang madula sa sugar content sang tubo.
Una na nga ginpabaskog sang DA kag SA ang mga tikang sa pagkontrol sini, lakip na ang chemical spraying, paggamit sang drones, pinansyal nga ayuda, kag biological control measures.#
