Maga-abot sa Pilipinas ang Hollywood star nga si Angelina Jolie agud mangin isa sa mga speaker sa Association of Southeast Asian Nations (ASEAN) Inclusive Growth Summit.
Ginkumpirmar sang Mastercard Center for Inclusive Growth sa ila social media pages nga magaupod ang nasambit nga Oscar-winning actress kag global advocate sa summit sa Nobyembre 11.
Bantog si Angelina nga isa ka award-winning actress, filmmaker kag humanitarian nga nagagamit sang iya impluwensiya agud mapabutyag ang nagkalain-lain nga importante nga problema sa kalibutan, lakip na ang krisis nga ginaatubang sang mga refugee, pagpang-abuso sa kababainhan kag kabataan, kag pagproteher sa mga yara sa delikado nga kahimtangan.
Magaupod siya sa panel discussion nga may titulo nga “From Memory to Possibility: Cambodia, Courage and the Power of Staying,” upod ang filmmaker nga si Rithy Panh.
Sa summit, pagahambalan kun paano mahimo nga oportunidad ang mga pagtilaw kag mapabakod pa ang pagsanyog sang ekonomiya sa Southeast Asia nga nagalakip sa tanan nga sektor.
Magaupod man sa mga speaker ang Broadway star nga si Lea Salonga, Filipino fashion designer nga si Rajo Laurel, kag Miss International 2016 Kylie Verzosa.
Suno sa Mastercard Center for Inclusive Growth, nagarepresentar ang mga speaker sang nagkalain-lain nga sektor nga may papel sa pag-uswag sang Southeast Asia.#
