Ginapreparahan na sang barangay council sang Barangay Rizal Pala-Pala II, City Proper ang posible nga epekto sang Super El Niño, ilabi na bangud wala sang regular nga water supply ang ila lugar.
Sa interview sang Bombo Radyo kay Punong Barangay Judy Navales sang nasambit nga barangay, iya ginpahayag nga nagahimo na sila sang mga nagakaigo nga mga tikang agud makapreparar sa kinahanglanon sang mga pumuluyo.
Suno sa iya, ang mga pumuluyo sa subong nagapangita sang tagsa-tagsa nila nga source sang tubig ukon lugar kun diin sila makasag-ob para may magamit sa ila panimalay.
Bangud sini, gina-tinguhaan man sang Barangay nga makapakig-angot sa Iloilo City Government para makapangita sang dugang nga source ukon suporta sa water supply.
May yara man sang duha ka drum ang Barangay nga ginahanda para masudlan sang tubig kag ginadistribute ini sa mga pumuluyo kon kinahanglanon.
Nagapanawagan man si Punong Barangay Navales sa mga pumuluyo nga indi na maghulat nga maglala anay ang sitwasyon antes maghanda.
Kinahanglan suno sa iya nga sa subong pa lang i-practice na ang pagkinot agud nga indi tuman nga mabudlayan sa ginapaabot nga phenomenon.
