Temporaryo nga magasuspender ang Department of Social Welfare and Development (DSWD-6) sa pag-issue sang guarantee letters sa idalom sang Assistance to Individuals in Crisis Situations (AICS) sugod Nobyembre 30, 2026.
Sa interview sang Bombo Radyo kay Richard Servilla, registered social worker sang DSWD-6, iya ginpahayag nga ang temporaryo nga suspensyon ang ginhimo agud mahatagan sang prayoridad ang pagproseso kag pagbayad sang mga obligasyon sang ahensya sa mga service provider nga naghatag sang serbisyo sa mga benepisaryo paagi sa guarantee letters.
Apang, gin-athag sang ahensya nga guarantee letters lamang ang temporaryo nga gin-suspend kag magapadayon gihapon ang iban nga serbisyo sang DSWD.
Pahayag pa ni Servilla, padayon man nga magahatag sang bulig ang ahensya sa mga indibidwal kag pamilya nga naga-atubang sang krisis, apang limitado lamang ini, ilabi na sa mga kaso sang emerhensya.
Ginpahayag man niya, ang mga kliyente nga magapangayo sang bulig pagkatapos sang Nobyembre 30, mahimo gihapon maproseso paagi sa outright cash assistance ukon direkta nga paghatag sang pinansyal nga bulig, depende sa assessment sang social worker kag maximum nga P10,000 ang mahimo mahatag sa idalom sini.
Dugang pa ni Servilla, mahimo man ma-reschedule ang pag-issue sang guarantee letter sa una nga adlaw sang trabaho sa 2027, kon may ara na sang General Appropriations Act kag kompleto kag balido ang mga dokumento nga kinahanglanon.
Pagpaathag sang DSWD-6 nga ang guarantee letter isa ka paagi sang paghatag sang pinansyal nga bulig sa mga benepisaryo nga may bayranan sa mga accredited service provider, kaangay sang ospital kag botika.














