Ginpanindugan ni Vice President Sara Duterte nga indi bastante ang pagbakal sang balde kag pagkolekta sang tubig para preparahan ang epekto sang Super El Niño sa pungsod.
Ini ang sabat sang bise presidente sa pahayag ni President Ferdinand Marcos Jr. nga magbakal ang mga tawo sang balde kag gamiton ini nga magkolekta sang tubig.
Suno kay VP Sara, dapat mas komprehensibo nga preparasyon ang pagahimuon bangud dako ang epekto sini sa mga mangunguma, manugpangisda, agrikultura, kag suplay sang kuryente sa pungsod.
“Mao nang dili na siya madala og balde lang, dako siya nga problema. Kay ngano man? Ug mauga ang yuta, magkaproblema ang agrikultura kay madaot man atoang ani,” pahayag ni VP Sara sa iya nga dayalekto.
Ginpahayag man sang bise presidente nga sandig sa mga eksperto, ini nga Super El Niño mahimo makapamala sang duta kag suba.
Dugang pa niya, indi dapat nga balde lang ang kolektahon bangud kun magmala ang duta, ma-eksperyensyahan ang problema sa agrikultura bangud maguba ang mga tanom.
Suno pa sa vice president, dapat nga preparado ang mga mangunguma agud malampuwasan ang El Niño kag dapat nga maghimo sang plano para sa posibilidad nga magkulang ang suplay sang tubig sa mga irigasyon.
“Ug di makaandam atong mga mag-uuma sa ilahang planting materials, na mu-survive og uga or drought, ug sa ilahang pagpangandam kung wala nay tubig ang irigasyon. Ug dili sila makaandam og ingon ana, madaot ang atoang food supply.”, sambit niya.
Nauna na nga ginpahayag sang state weather bureau nga magabaskog ang El Niño samtang nagahingapos ang tuig kag mabatyagan ini tubtub sa una nga bahin sang 2027.
