Naggwa sa mga rekord sang Bureau of Internal Revenue (BIR) nga nakabaton sang compensation income si Vice President Sara Duterte halin sa Davao City government sang 2023 apisar nagapungko na siya bilang bise presidente sang amo nga tion.
Sa impeachment trial kahapon, Oktubre 8, nagtestigo si Anne Loraine Garcia-Marquez, chief of staff sang BIR Office of the Commissioner, nga nagpirma si Duterte sa BIR Form 2316 kaupod ang Davao City government nga nakalista bilang iya employer sang 2023.
Suno sa testigo, nakabaton si Duterte sang compensation income halin sa Davao City government, apang wala niya ginpahayag ang eksakto nga kantidad.
Suno naman kay private prosecutor Jay Tolosa, nagabalor sang P82,000 ang amo nga income.
Ang utod ni Vice President Duterte nga si Sebastian Duterte amo ang mayor sang Davao City halin sang 2022.
Nakasaad sa Article 7, Section 6 sang 1987 Constitution nga indi mahimo makabaton ang Presidente kag Bise Presidente sang iban pa nga emolument ukon bayad halin sa gobyerno ukon sa iban nga source samtang yara sa ila termino.
Ginadumili man sang Article 7, Section 13 sa Bise Presidente ang pag-practice sang iban nga propesyon samtang yara sa puwesto.
Ang testimonya sang BIR official kabahin sang kaso sang prosecution may kaangtanan sa alegasyon sang indi mapaathag nga pagdaku sang manggad ni Duterte, nga suno sa prosecution mahimo nga paglapas sa pagsalig sang publiko kag culpable violation of the Constitution.
Suno pa sa BIR witness, naglab-ot sa P85.34 million ang gin-combine nga net income nanday VP Sara kag bana sini nga si Atty. Mans Carpio halin 2007 tubtob 2025 pagkatapos sang buwis.
Sandig sa prosecution, indi ini makahatag sang paatghag sa pagdaku sang net worth ni Duterte nga naglab-ot sa P98 million base sa iya pinakabag-o nga Statement of Assets, Liabilities and Net Worth (SALN).
