Ginmandu ni Presiding Officer Francis Escudero ang pagpanas kag pag-upload liwat sang livestream sang ika-37 nga adlaw sang impeachment trial ni Vice President Sara Duterte matapos makita sa screen ang mga confidential nga dokumento.
Ini matapos nagpahayag sang pagkabalaka si Bureau of Internal Revenue (BIR) Chief of Staff Atty. Anne Loraine Garcia-Marquez sang ma-flash sa screen ang kopya sang Letters of Authority (LOA) sang BIR sa tunga sang cross-examination ni defense counsel Atty. Kristine Ferrer.
Suno kay Marquez, dapat gintabunan ukon gin-redact ang mga pangalan sang revenue officers nga makita sa dokumento agud maprotektahan ang ila privacy.
Nagpahayag man sang suporta sa iya pagkabalaka ang prosecution counsel nga si Atty. Erwin Matib nga nagsiling nga nalapas ang privacy sang mga tawo nga nalakip sa dokumento bangud nakita sang publiko ang ila mga pangalan.
Ginpahanumdom man ni Escudero ang defense kag prosecution panels nga maghalong sa pagpresentar sang mga ebidensya kag siguruhon nga gintabunan anay ang sensitibo nga impormasyon, pareho sang mga pangalan kag address, antes ini ipakita sa korte.
Ginpahanumdom man sini ang mga miyembro sang media nga mangin responsable kag sensitibo sa pag-publish sang impormasyon agud malikawan ang posible nga paglapas sa Data Privacy Act.
