Nagpasaka ang Bureau of Internal Revenue (BIR) sang criminal complaint batok kay former presidential spokesperson Harry Roque, sa iya asawa, kag sa iya associate bangud sang tax deficiency.
Gin-file ang panumbungon sa Department of Justice (DOJ) subong nga adlaw, Abril 27.
Partikular nga ginreklamo sanday Roque, Mylah Reyes Roque, kag Percival Sazon Ortega sa alleged tax evasion nga naangot sa Biancham Holdings and Trading Inc.
Gina-estimate sang BIR nga nagadangat ang total tax deficiency sa masobra P3.35 million, inclusive sang surcharges kag interest.
Ginpahayag pa sang ahensya nga may yara sang probable cause nga kasuhan ang mag-asawa nga Roque kag si Ortega bangud sang “willful attempt” nga palagyuhan ang ila taxes nga nakabutang sa Section 254, kag failure to file tax returns sa idalom naman sang Section 255 sang National Internal Revenue Code of 1997 (as amended).
Nahibaluan nga ang Biancham Holdings and Trading Inc. amo ang kumpaniya nga ginapanag-iyahan anay ni Roque kag sang iya associates.
Isa ini sa mga naistoryahan sa kasagsagan sang isyu sang illegal Philippine offshore gaming operators (POGOs) nga naga-involve sang Chinese nationals.
Sa imbestigasyon sang Senado sa POGOs, nabulgar nga may yara sang business “interest” si Roque sa balay sa Tuba, Benguet kun sa diin nadakpan ang isa ka pugante nga Chinese.
Ang amo nga balay ang ginapanag-iyahan sang korporasyon nga ginatawag nga PH2 nga ginapanag-iyahan sang korporasyon sang pamilya ni Roque nga amo ang Biancham Holdings and Trading.
Halin sang naangot si Roque sa POGO, nagguwa ini sa Pilipinas kag wala na nagbalik. Sang Nobyembre 2025, ginkanselar na ang iya nga passport.
Sa iya statement subong nga gab-i, gintawag ni Roque ang criminal complaint nga “legally and factually baseless.”
“Absent actual issuance or subscription of shares, there is no taxable event that could give rise to liability under Philippine tax law. The allegations are therefore premised on a misunderstanding of basic corporate and tax principles. Any suggestion of tax liability at this stage is unfounded and premature,” pahayag sini.
“We also categorically state that all required tax returns have been properly and diligently filed in accordance with law. Any assertion of failure to comply with filing obligations is incorrect,” dugang niya.
Nahibaluan nga sa idalom sang Section 254 sang Tax Code, ang mga naga-komiter sang tax evasion mahimo mamultahan sang P500,000 tubtub sa P10 million kag masilutan sang pagkapreso nga anum tubtub 10 ka tuig.
Sa pihak nga bahin, ang failure nga mag-file sang tax returns sa idalom sang Section 255 sang Tax Code ang mahimo man mamultahan kag masilutan sang pagkapreso nga tubtub sa 10 ka tuig magluwas pa sa pagbayad sa liabilities.#
