Nagdeklara na sang State of Calamity ang Lambunao, Iloilo bangud sa epekto sang prolonged drought nga nakaapekto sa masobra 2,600 ka mga mangunguma kag nagresulta sang masobra P46.1 million nga damage sa sektor sang agrikultura.
Sa interview sang Bombo Radyo kay Vice Mayor Arvin Losaria, iya ginpahayag nga sandig sa data sang Municipal Agriculture Office, humalin pa sang Hulyo nga n-eksperyensyahan sang Lambunao ang drought nga nagtuga sang dako nga kapyerdihan sa nagkalain-lain nga agricultural produce sa banwa.
Sa kabug-usan, 2,605 ka mangunguma ukon 37.8 percent sang total farmer population ang naapektuhan sang kalamidad.
Naglab-ot naman sa 1,763.66 hectares sang agricultural land ang apektado, nga may estimated total damage nga P46,134,107.83.
Pinakadaku nga naigo ang rice sector, nga may 2,469 ka mangunguma ukon 39.61 percent sang total rice farmer population ang naapektuhan.
Naglab-ot naman sa 1,682.12 hectares sang humayan ang apektado, nga may damage nga P43,025,237.79.
Sa corn production, 57 ka mangunguma ang naapektuhan, nga may 41.74 hectares nga apektado kag estimated damage nga P1.92 million.
Samtang, 80 ka mangunguma naman ang naapektuhan sa High-Value Crops (HVC), nga may 39.8 hectares sang agricultural land nga apektado kag P1.23 million nga estimated losses.
Suno pa kay Losaria nga nakipag-angot na ang local government sang Lambunao sa mga government agency nga ginalakipan sang Department of Agriculture, Department of Social Welfare and Development, kag sa Iloilo Provincial Government para sa dugang nga bulig sa mga mangunguma nga apektado sang ini nga drought.
Dugang pa diri, antes pa man magdeklarar sang State of Calamity, nakahatag na ang Municipal Agriculture Office sang 1,200 bags sang corn seeds kag ginalauman nga madugangan pa ini sang 1,500 nga bags para makatanom ang mga mangunguma sang mais sa tunga sang epekto ang El Niño.
