Nagapanawagan ang Land Transportation Office (LTO) 6 sa mga government officials nga siguruhon nga may nagakaigo nga training kag pagdisiplina ang ila mga driver, ini kasunod sang nag-viral nga video sang government-owned vehicle nga nagdiritso apisar nga may nagatabok sa pedestrian lane kag nag pondo na ang patrol car sang POSMO sa City Proper.
Sa interview sang Bombo Radyo Iloilo kay Atty. Gaudioso Geduspan II, Director sang LTO-6, ginpahayag sini nga ang kakulang sang disiplina sang mga government driver nagareflect man sa leadership sang mga opisyal nga nagadumala sa ila.
Samtang, ginpahayag man ni Geduspan nga dagdagan sang LTO sang show cause order ang head sang concerned government office, pananglitan ma-identify na ang nasambit nga government vehicle kag ang plate number sini.
Paagi sini, mapangayuan sang paathag ang head sang opisina kag mahibaluan ang identity sang driver kag madisiplina ini.
