Ginpasiguro sang Department of Environment and Natural Resources (DENR) nga padasigon ang pagpatuman sang Cadastral Line Delineation Survey sa Jaro River matapos ang pagpirma sang Memorandum of Agreement (MOA) upod sa Iloilo City Government subong nga adlaw, Nobyembre 12 kung sa diin nga nagpain sang P6 milyon nga pondo para diri.
Ang nasambit nga kasuguan natigayon matapos ang kapin lima ka tuig nga paghulat antes ini lubos nga na-materialize.
Suno kay DENR Regional Director Atty. Ramar Niel V. Pascua, katuyuan sang proyekto nga mabal-an ang husto nga mga dulonan ukon boundary sang Jaro River agud mas mapabaskog ang river rehabilitation, disaster risk reduction, kag long-term flood control solutions sa syudad.
Sa ginpatigayon nga MOA signing, ginpahayag ni Pascua ang ila dako nga pagpasalamat sa administrasyon sang alkalde sa paghatag sang nasambit nga pondo.
Ginpahayag ni Pascua nga nabatian nila ang panawagan kag instruction sang Iloilo City Government nga palip-uton ang timeline sang mga aktibidad agud mas mapadasig ang pag-implementar sini.
Kaupod man sa nasambit nga aktibidad ang mga representante gikan sa Surveys and Mapping Division sang DENR nga amo ang magatutok sa teknikal nga aspeto sang trabaho, kabahin sang padayon nga kolaborasyon sang duha ka bahin para sa science-based solutions kag climate action programs sa siyudad.
Ginpasalig sang ahensya nga magabuligay sila upod sa Iloilo City Government agud masiguro nga gilayon nga mapuslan sang publiko ang nasambit nga proyekto.
