Gin-anunsyo sang Department of Public Works and Highways (DPWH) nga ginlakip sa ginaproponer nga 2027 national budget ang pondo nga para sa pagpahagan-hagan sang baha.
Suno kay Public Works Secretary Vince Dizon, prayoridad sang gobyerno ang pagpatuman sang mga flood master plan, pagpaayo sang mga imprastraktura nga naguba bangud sang baha, kag pagpauswag sang flood control system sa mga mayor nga syudad.
Sa press briefing sa Malacañang, ginpahayag ni Dizon nga lakip sa mga intervention ang pagkaayo sang drainage system, paglimpyo kag dredging sang mga suba kag waterways, pagtukod sang pumping stations, kag iban pa nga flood mitigation infrastructure.
Prayoridad man sang gobyerno ang pag-rehabilitate sang mga flood mitigation infrastructure nga naguba sa nagligad nga mga tuig.
Lakip sa mga lugar nga gina-prayoridad ang Metro Manila, Cavite, Laguna, Bulacan, Cebu, kag iban pa nga lugar sa pungsod nga masami ginabaha.
Nahibaluan nga nakapasa na ang DPWH sang proposed 2027 budget sini sa Department of Budget and Management (DBM) apang wala pa nahibaluan ang pinal nga kantidad nga igahatag para sa mga proyekto sa flood management kag mitigation.
“With the upcoming submission of the 2027 budget, we will include flood management and flood mitigation projects,” suno sa tiglikom. “We are focusing on various interventions.”
“I won’t say anything yet because I have not seen the final version that the DBM will submit,” dugang sini.
Isa sa mga ginapropose nga proyekto amo ang P1.5-billion nga drainage rehabilitation project sa bilog nga Taft Avenue sa Metro Manila.
Sa España Boulevard naman, apat ka cross drains ang ginaplano nga tukuron umpisa sa Setyembre ukon Oktubre sini nga tuig, kag may dugang pa nga mga pagpaayo nga gina-propose para sa 2027.
Sa Cavite, ginaplano man ang mga intervention sa Kawit, Noveleta, kag Bacoor, nga madugay na nga naga-atubang sang problema sa pagbaha.
Suno kay Dizon, kinahanglan padayunon ang mga tikang batok sa baha, ilabi na bangud ang mga nagligad nga pagbaha gin-impluwensyahan sang indi kinaandan nga mabaskog nga ulan, kag sang problema sa mga flood mitigation infrastructure nga indi maayo ukon indi husto ang pagpatukod.
