Nangin maayo ang resulta sang pag-istoryahanay sa committee hearing nga ginpangunahan ni Iloilo Board Member June Mondejar, nahanungod sa alarming nga pagbaha sa pila ka bahin sang banwa sa probinsya ilabi na ang banwa sang Pototan, Zarraga kag New Lucena.
Sa interview sang Bombo Radyo kay Mondejar, iya ginpahayag nga kaupod ang mga barangay officials, natungdan nga mga ahensya kag Local Government Units na-validate na ang mga rason sang pagbaha sa nasambit nga lugar.
Pahayag pa sini magapatigayon sang dredging sa creek sa banwa sang Zarraga kun sa diin ang DPWH ang magahatag sang dredging machine, samtang ang LGU sang Zarraga ang magahatag sang gatong.
Ginasuspetsahan man nga ang outlet sang tubig sa Zarraga nga nagkipot nga amo ang isa sa mga rason sang pagbaha sa sa amo nga banwa kag sa mga kalapit sini nga lugar.
Ginpangabay man ni Mondejar sa mga nasambit nga mga banwa nga magpasar sang ordinansa nga magadumili sa pagbutang sang mga obstruction sa mga creek.
Nag-apelar man sila sa National Irrigation Administration nga regular nga limpyuhan kag i-maintain ang mga irrigation canal.
Dugang pa ni Mondejar nga paagi sa resolution sang Sangguniang Panlalawigan, igapadala sa mga concerned offices ang ini nga mga plano agud maumpisahan gilayon ang mga tikang sa pagpugong sang pagbaha sa mga nasambit nga lugar.
