Pilason ang isa ka lalaki matapos ini ginbuno sang iya abyan sa Barangay San Antonio, San Miguel, Iloilo.
Ang biktima amo si alyas Ariel, 37-anyos samtang ang nagbuno amo si alyas Romjun, 35-anyos, lunsay residente sang nasambit nga barangay.
Sa interview sang Bombo Radyo kay Police Major Bryan Alejo, hepe sang San Miguel Municipal Police Station, iya ginpahayag nga halin ang duha ka indibidwal sa isa ka birthday celebration sa gym sang barangay kag nagkadto sa isa ka sari-sari store kun sa diin natabo ang insidente.
Ginpahayag nga indi pa kuntani luyag sang biktima nga magpauli ang suspek.
Dugang pa sini, matapos nga nagkomprontahanay ang duha, gilayon nga ginbuno ni Romjun si Ariel sang duha ka beses.
Ginsagang naman sang biktima ang kutsilyo paagi sa iya wala nga kamot rason nga nasamaran ini.
Gilayon nga gindala sa ospital ang biktima para madapatan sang pagbulong.
