Dakop sa ginpatigayon nga drug-bust operation ang tatlo ka lalaki sa Brgy. San Jose, San Miguel, Iloilo.
Kasunod ini sang ginpatigayon nga operasyon sang San Miguel Municipal Police Station kun sa diin nabaklan ang main subject sang isa ka sachet sang suspected shabu nga may balor sang ₱2,500.
Sa interview sang Bombo Radyo kay PMaj. Bryan Alejo, hepe sang San Miguel Municipal Police Station, iya ginpahayag nga ang mga suspek amo ang isa ka High Value Individual (HVI) kag duha ka Street Level Induvidual (SLI) nga sanday alyas Richard, 51 anyos, nga temporaryo nga nagatinir sa nasambit nga lugar, alyas Ronel, 42 anyos sang Santa Barbara, kag alyas Raffy, 31 anyos sang Barangay 9, San Miguel, Iloilo.
Nahibaluan nga si alyas Richard ang ginakuhaan sang druga nanday alyas Raffy kag Alyas Ronel, kun sa diin ginabaligya niya ini sa mga nagkalain-lain nga mga lugar.
Sa karun, yara na sa kustodiya sang kapulisan ang mga subject kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
