Magapasaka sang reklamo si Ombudsman Jesus Crispin “Boying” Remulla sa Department of Information and Communications Technology (DICT) kag sa social media platform nga Facebook batok sa mga account nga nagapalapta sang sayop nga impormasyon kaangot sa iya ikaayong-lawas kag sa Office of the Ombudsman.
Suno kay Remulla, katuyuan sang amo nga fake news nga magpatubo sang pagpang-duhaduha sa publiko kag magpaluya sang pagsalig sang mga tawo sa gobyerno kag sa iya opisina.
Sa press conference kahapon, Nobyembre 6, ginpahayag ni Remulla nga hingyuon niya sa Facebook nga ipakakas ang mga account nga ginagamit sa pagpalapta sang propaganda kag pagpatalang sa publiko.
“There has been a lot of fake news lately. People are trying to create doubt about the office or maybe even in the state of my health,” pahayag sang Ombudsman.
“And, I think, this has to stop. And we are filing a complaint with the DICT and Facebook itself to stop the proliferation of fake news.”
Ginpahayag man ni Remulla nga nakabaton siya sang mga mensahe halin sa iya mga abyan sa media nga nagasiling nga ginapangamuyuan nila siya matapos naglapta ang mga balita nga may problema siya sa iya panglawas.
Ginpahayag naman sang Ombudsman nga halos tatlo na ka tuig nga wala na siya sang cancer kag ginpasalamatan niya ang mga nagakabalaka sa iya kahimtangan.
“Actually, kaya ako na-alarm, I’ve received texts from people in media na friends ko, saying they were praying for me,” dugang niya. “Eh kung sila naniniwala… Ang sagot: Thank you, but it’s been almost three years since I have been cancer free. Kaya lang, gusto pa rin nilang ipakalat at bigyan ng kahinaan ang aming opisina.”
Ginhimo man ni Remulla nga halimbawa ang amo nga insidente kun paano ginagamit ang social media sa pagpalapta sang sayop nga impormasyon kag pagtunto sa publiko.
“That’s just an example how social media is being used kaya we’re filing complaints with Facebook to take down many of these accounts that do not portray the truth and are there for propaganda purposes and deceive the people,” dugang sini.
Madumduman nga nagpaidalom si Remulla sa quintuple bypass surgery sang 2023 matapos madiskubre nga may balatian siya sa tagipusuon. Samtang nagapaayo, nadiskubre man nga may leukemia ukon cancer siya sa dugo.#
