Ginpasiguro ni Ombudsman Jesus Crispin “Boying” Remulla nga i-verify nila ang impormasyon nga may kaupod nga personal staff sa iya selda si anay House Speaker kag Leyte Representative Martin Romualdez nga subong naka-detain sa New Quezon City Jail.
Ini matapos ginpahayag ni Bureau of Jail Management and Penology (BJMP) Jail Warden Lourdes Pacion sa Sandiganbayan nga may personal staff si Romualdez nga naga-upod sa iya sa selda.
Ginpahayag ini ni Pacion sa hearing kun sa diin gina-istoryahan ang kahimtangan sang detensyon ni Romualdez kasunod sang alegasyon sang columnist nga si Ramon Tulfo nga nagaguwa-guwa ang anay House Speaker sa presuhan paagi sa ambulansya.
Ginbawi na ni Tulfo ang amo nga alegasyon kag ginapahayag nga na-“kuryente” siya sa amo nga impormasyon nga iya ginbalhag.
Suno naman kay Remulla, magapatigayon sila sang mga surprise inspection sa presuhan sa Payatas sa bisan ano nga oras agud masiguro nga ginatuman ang tanan nga regulasyon kag wala sang nagabaton sang espesyal nga pagtratar.
Gin-athag man sang Ombudsman nga indi pwede nga may personal assistant ang isa ka detainee sa sulod sang iya selda bangud isa ini ka pabor ukon espesyal nga pagtratar nga wala ginatugutan.
“To remove any doubt about how things are going, we will do surprise visits to jail. We will visit Payatas, at any given hour, whether it be morning or it’s midnight, just to check on everything and make sure that all the rules are being followed,” suno kay Remulla sa press conference.
“We will have to validate it. Him having a PA, ngayon ko lang narinig iyon eh. Kaya lalo ako nagagalit ‘pag ganun e. Hindi puwede ‘yun,” dugang sini.
Samtang, ginpahayag naman ni Interior and Local Government Secretary Jonvic Remulla, utod sang Ombudsman, nga ang nasambit nga personal staff isa lamang ka bisita nga nagasulod kag nagaguwa sa pila ka oras.
Si Romualdez isa sa mga ginpasakaan sang P7.4-billion plunder case kaupod sanday anay House appropriations panel chairperson Zaldy Co, iya personal assistant nga si Joselyn Tragua Sereño, kag Samchan Foreign Exchange Corporation president Felicito Cristobal Guevarra, bangud sa ila ginatudlo nga involvement sa anomalya sa flood control projects.
Sa pihak sini, padayon nga ginapahayag ni Romualdez nga inosente siya sa mga kaso kag handa nga magtestigo agud depensahan ang iya kaugalingon sa tion nga ipresentar na sang depensa ang ila mga ebidensya sa bail hearing.#
