Ginkansela ni Ombudsman Jesus Crispin Remulla ang iya nakatalana nga biyahe sa France bangud sa nagapadayon nga mga protesta sa nasambit nga pungsod sa Europa.
Dapat kuntani nga magabiya na si Remulla sa Nobyembre 17 agud makigkita sa mga opisyal sang France tuhoy sa mga Philippine officials nga ginapatihan nga nagapanago sa nasambit nga nasyon.
Suno kay Remulla, indi na ini madayon bangud naglapta na sa bug-os nga pungsod ang mga demonstrasyon.
Ginpamangkot man ang Ombudsman kun ano ang rason nga wala nagaprotesta kaangay sang mga French ang mga Pilipino.
“I don’t think you want to be caught in the middle of it. For those who are hiding there, good luck to them,” sabat sini.
Ginhingadlan man ni Remulla ang mga personalidad nga ginapatihan nga nagapanago sa France, nga sandig sa iya impormasyon nagalakip kanday Senator Loren Legarda, iya anak nga si Batangas Representative Leandro Leviste, kag anay kongresista nga si Zaldy Co.
Nagaatubang sanday Legarda kag Leviste sang mga reklamo nga plunder kag graft may kaangtanan sa P10-billion nga mga kontrata sang solar energy company ni Leviste nga ginapatihan wala nagtuman sa ila kasugtanan tuhoy sa suplay sang kuryente.
Samtang, nagaatubang naman si Co sang madamo nga kaso sa Sandiganbayan bangud sa ginapatihan nga involvement sini sa anomaliya sa flood control projects.
Suno sa Ombudsman, tubtob Nobyembre sang sini nga tuig, naka-file na sila sang 79 ka kaso may kaangtanan sa flood control anomaly batok sa 67 ka akusado, nga nagalakip sang indi magnubo sa P10.78-billion nga pondo sang gobyerno.
Dugang pa ni Remulla, apat pa ka kongresista ang yara sa idalom sang preliminary investigation may kaangtanan sa nasambit nga iskandalo.
Nagpasaka man ang Ombudsman sang 57 pa ka kaso sa Sandiganbayan sang Oktubre nga nagalakip sang P13.12-billion nga pondo sang gobyerno.#
