Isa sa duha ka ginatudlo nga suspek sa pagluthang-patay sa lending company manager sa Dueñas, nakaagi na preso sang una —punong barangay
Nakaagi na nga napreso ang isa sa duha ka suspek sa nagluntad nga pagpangluthang-patay sa isa ka lending manager sang lending company sa Barangay Ponong Grande, Dueñas, Iloilo sang Myerkules, Nobyembre 4.
Ini amo ang suspek nga si alias Bongbong, tumandok sang Barangay Sablogon, Passi City nga yara sa kustodiya sang kapulisan matapos gintudlo sang duha ka mga testigo.
Sandig sa pulis, si alias Bongbong ang nagmaneho sang motorsiklo nga gin-gamit sang ginsundan kag ginpatay ang biktima.
Sa interview sang Bombo Radyo sa kay Punong Barangay Narciso Payas sang Barangay Sablogon, iya ginpahayag nga nahibaluan niya ang mga insidente kun sa diin involved si alias Bongbong.
Ginsaysay ni Payas nga nakaagi na nga nadakpan si alias Bongbong matapos ini nga mang-hold-up sa Roxas City sang nagligad nga tuig, kag nadakpan naman siya sa banwa sang Carles nga may possession nga 45mm nga granada.
Madumduman nga ang nagtaliwan nga biktima amo si alias Roy, 36-anyos, residente sang Brgy. Man-it, Passi City.
Ginbawian ini sang kabuhi, matapos makaagum sang multiple gunshot wounds sa iya nga liog, tiil kag iban pa nga parte sang lawas.
Apang, una naman nga ginpanginwala ni alias Bongbong nga may kaangtanan ini sa krimen, bangud suno sa iya, inosente siya, kag yara siya sa ila nga balay sa Sablogon kag nagapang-gahit sang iya garden sang natabo ang pagpangluthang sa Duenas.
Sa karun, ginatan-aw sang mga pulis nga work-related kag posible man nga personal grudge ang rason sang pagpangluthang kag padayon sa gihapon ang imbestigasyon.
