Nagpanugyan si Msgr. Meliton Oso sa mga tigulang na nga sumilimba nga pili-on nga magsimba sang mas temprano ukon sa hapon agud indi matam-an sang epekto sang init.
Ini kaangot sa latest update sang Philippine Atmospheric, Geophysical and Astronomical Services Administration (PAGASA) nga yara na sa tropical Pacific ang “very strong El Nino”, ginapaabot nga maga-peak sa katapusan sang tuig, kag padayon nga mabatyagan ang epekto tubtub sa tunga-tunga sang 2027.
Sini nga semana, pila ka beses naman nga naglab-ot sa danger range ang heat index sa Iloilo City nga peligroso para sa may edad na kag vulnerable population bangud sa posible nga heat cramps, heat exhaustion, kag heat stroke.
Sa interview kay Msgr. Oso nga amo ang director sang Jaro Archdiocesan Social Action Center, iya ginpahayag nga kinahanglan nga indi gid pagkalimtan nga magdala sang panagang kaangay sang payong kag kalo, kag dapat nga mag-inom gid sang madamo nga tubig.
Pahayag pa sini, responsibilidad sang kada parokya nga pahanumdumon ang kada nasakpan nga tumuluo nga patigayunon ang nagakaigu nga hilikuton agud nga indi maapektuhan sang tuman nga kainit.
Ginpakigbahin man sini nga may mga pagsinapol na ang Social Action Network sa nagkalain-lain nga ahensya sang gobyerno agud magbuligay sa tunga sang epekto nga dala sang sini nga weather phenomenon.
Nahibaluan nga sa Archdiocese of Manila, nauna na nga naghatag sang instruction si Archbishop Jose Cardinal Advincula sa tanan nga parokya kag komunidad sa Arkidiyosesis nga magpangamuyo sang Oratio Imperata ad Petendam Pluviam (prayer for rain) kadungan sang adlaw-adlaw nga mga misa umpisa sa Domingo, Nobyembre 8.#
