Gina-engganyo sang Land Transportation Office ang Local Government Units kag kapulisan nga pabaskuron pa ang pagpatuman sang road safety rules sa mga kabanwahanan.
Ini kasunod sang vehicular accident sa Sara, Iloilo kun sa diin involve ang mga kabataan.
Sa interview sang Bombo Radyo kay LTO-6 Regional Director Atty. Gaudioso Geduspan II, iya ginpahayag nga dapat sundon sang mga motorista ang protocols nga ginapatuman sang LTO.
Suno pa sa iya nga kun magsakay sa motorsiklo dapat duha lamang ka indibidwal kag kinahanglan man nga magsuksok sang nagakaigo nga helmet kag protective gear.
Pahayag pa sini, indi dapat mangin normal sa komunidad nga ginapabungol-bungolan lamang ang mga traffic personnel.
Gani, ginpabaskog ni Geduspan ang pagpatuman sang traffic rules sa lokal nga lebel, ilabi na sa mga rural areas.
Indi mahimo suno sa iya nga ang LTO lamang ang mag-monitor sang tanan nga dalan.
Kinahanglan man, suno sa opisyal, ang bulig sang mga LGU, PNP, local traffic enforcers kag iban pa nga stakeholders sa pagmintinar sang safety measures sa dalan.
Nagapangabay man ini sa publiko nga mangin mas responsable kag indi magsalig lamang sa presensya sang LTO sa pagpatuman sang mga traffic rules.
Dugang pa niya, ang road safety responsibilidad sang tanan agud malikawan ang mga aksidente kag maprotektahan ang kabuhi sang mga motorista kag pasahero, ilabi na ang mga kabataan.
