Nagdeklara na sang State of Calamity ang banwa sang Lambunao, Iloilo bangud sa padayon nga epekto sang prolonged dry spell nga nagapabudlay sa sektor sang agrikultura kag nagaapekto sa palangabuhian sang madamo nga mangunguma.
Base sa official records sang Municipal Agriculture Office, naglab-ot na sa 2,605 ka mangunguma, ukon 37.8 percent sang kabug-usan nga farming population sa banwa, ang apektado sang malawig nga tag-init.
Nagalab-ot naman sa 1,763 hectares sang agricultural land ang naapektuhan, nga may estimated agricultural damages nga nagalab-ot sa ₱46 million.
Bangud sini, gin-adopt sang Sangguniang Bayan ang Resolution No. 2026-152 sang November 9, 2026, nga nagadeklara sa Lambunao bilang under State of Calamity.
Pinaagi sa sini nga declaration, mahimo na nga ma-mobilize sang Local Government Unit (LGU) ang kinahanglanon nga resources agud mahatagan sang nagakaigo nga interventions kag assistance ang mga apektado nga pamilya kag komunidad.
Ginpabutyag man sang Sangguniang Bayan ang ila suporta sa tikang sang Municipal Government agud masiguro nga ang bulig makalab-ot sa mga pumuluyo nga mas nagakinahanglan sini, ilabi na ang mga mangunguma nga direkta nga naapektuhan sang kalamidad.
