Ginalantaw sang opisyal sang Department of Economy, Planning, and Development (DepDev) nga maghinay ang economic growth sang Western Visayas kasunod sang pagtimbuok sang inflation rate sa 9.2% sang Setyembre kag 9.7% sang Oktubre.
Ini ang ginplastar ni DepDev Undersecretary Carlos Bernardo Abad Santos kadungan sang Philippine Economic and Investment Briefing sa Iloilo City.
Ginbalikan sini nga naka-rekord ang rehiyon sang 6.4% nga economic growth sang nagligad nga tuig nga amo ang pinakamadasig ang pagtubo sang ekonomiya sa 18 ka mga rehiyon sa pungsod.
Nagsanyog ini halin sa 4.4% nga napagkit naman sang 2024.
Apang suno kay Santos, mahimo nga maapektuhan ang economic growth bangud sa nagataas nga inflation kag mga problema sa estruktura sang ekonomiya nga kinahanglan nga masolbar.
Gin-athag sini nga bisan ginapaabot sang DepDev nga magapabilin nga positibo ang pagtubo sang ekonomiya sang rehiyon sa 2026, posible nga indi ini maglab-ot sa 6.4% nga kaangay sa nalab-ot sang nagligad nga tuig.
Nahibaluan nga nagdangat sa P683.44 billion ang gross regional domestic expenditure sang rehiyon sang 2025 nga mas mataas ipaanggid sa P642.47 billion sang 2024.
Sa amo nga briefing, ginpanugyan sang DepDev official nga isa sa mga dapat tutukan amo ang pagpadayon kag pagpalig-on sang produksyon sa agrikultura bangud mas daku ang bahin sini sa ekonomiya sang Western Visayas kun ikumparar sa national average.
Gin-engganyo sini ang pagpasangkad sang pagproseso sang mga produkto sa sulod mismo sang rehiyon agud mas madugangan ang ila balor antes ini ibaligya sa iban kag makahatag man sang dugang nga oportunidad sa industriya kag trabaho.
Agud mahimo ang manufacturing kag food processing, ginpahanumdom man sini nga importante nga masiguro ang bastante, masaligan, kag kasarangan nga suplay sang kuryente.
Nahibaluan nga sang tinalikdan nga binulan, isa ang suplay sang kuryente sa ginaagunto sang mga pumuluyo sa rehiyon bangud sa pagbuslanay sang red kag yellow alerts sa Visayas Grid.
Sandig sa pinakaulihi nga report sang Department of Energy (DOE), wala pa sang kasiguruhan sa power supply security, ilabi na bangud ginakabig nga daku nga pamahog sa grid stability ang masami nga power plant outages kag pagbuhin sang generating capacity.#
