Ginmandu sang Sandiganbayan nga i-suspend sa sulod sang 90 ka adlaw si anay House Speaker Martin Romualdez bangud sa ginapangatubang sini nga plunder case nga may kaangtanan sa flood control scandal.
Suno kay Sandiganbayan 3rd Division Executive Clerk Dennis Pulma, kinahanglan untatan ni Romualdez ang paghimo sang iya mga katungdanan sa iya opisina ukon sa bisan ano pa nga posisyon sa gobyerno sa bug-os nga tion sang suspensyon.
Nagapangatubang si Romualdez sang kaso nga plunder nga isa ka non-bailable offense bangud sa ginapatihan nga pagbaton sini sang P7.44 billion nga kickbacks halin sa mga proyekto sang gobyerno.
Ginpasaka sang Office of the Ombudsman ang kaso batok sa anay House Speaker sa Sandiganbayan sang September 7 kag nagpagwa man ang korte sang warrant of arrest batok sa iya sa amo man nga adlaw.
Samtang, nagapabilin si Romualdez sa New Quezon City Jail sa Payatas halin sang September 14.
Suno sa Section 5 sang Republic Act 7080 ukon Plunder Law, mandatory ang suspensyon sang isa ka public official nga ginpasakaan sang kaso nga plunder samtang ginahusgaran ini sa korte.
Nahibaluan nga subong, si Romualdez amo ang Representative sang first district sang Leyte.#
