Bastante pa sang tubtob 125 ka adlaw ang suplay sang manok sa pungsod bisan pa may pamahog sang posible nga mabaskog nga El Niño nga mahimo magpadayon tubtob sa una nga bahin sang masunod nga tuig.
Suno kay Department of Agriculture (DA) Secretary Francisco Tiu Laurel Jr., “fairly healthy” ukon bastante ang present stock sang manok sa pungsod bangud padayon man ini nga ginadugangan.
Posible suno sa iya nga magnubo ang produksyon sang manok kun mataas ang temperatura, apang bisan magnubo ang suplay sa 90, 80 ukon 70 ka adlaw, ginalantaw gihapon ini nga safe bangud padayon nga gina-replenish ang suplay.
Nauna na nga ginpahayag sang United Broiler Raisers Association ukon UBRA nga nagsaka sang 10 pesos kada kilo ang presyo sang manok bangud sa kabalaka sa mas gamay nga suplay.
Suno naman sa United States Department of Agriculture, ginapaabot nga mag-abot sa 780,000 metric tons ang imported chicken meat sang Pilipinas sa 2027 agud masabat ang nagadaku nga demand halin sa food manufacturing kag food service industries.
Mas mataas ini sang 14.7 porsiyento ipaanggid sa ginabulubanta nga 680,000 metric tons nga imports sini nga 2026.
Samtang, lakip sa mga produkto nga apektado na sang El Niño amo ang mais nga importante sa paghimo sang feeds para sa baboy kag manok.
Suno kay Tiu Laurel, partikular nga naapektuhan sang weather phenomenon ang produksyon sang mais sa Isabela gani nagsaka ang presyo sini.
Ginapadayon naman sang DA ang pagpasaka sang minimum access volume para sa mais sa 500-thousand metric tons agud mabuligan nga mapunggan ang posible nga pagsaka sang gasto sa feeds sang mga nagapadaku sang baboy kag manok.
