Magadag-dag sang Show Cause Order ang Land Transportation Franchising and Regulatory Board ukon LTFRB batok sa operator sang modernized bus nga nakuhaan sang video nga nagpadayon sa pag-drive apisar pula na ang traffic light sa Delgado Street, Iloilo City sang damlag lang.
Sa interview sang Bombo Radyo kay Atty. Joscet Abellar, spokesperson sang LTFRB, iya ginpahayag nga sa kaangay nga insidente, kinahanglan sundon ang due process kag hatagan sang kahigayunan ang operator nga magpaathag sang rason sa natabo nga paglapas sa traffic rules and regulations.
Pahayag pa ni Abellar, kon mapamatud-an nga may paglapas sa terms and conditions sang franchise, ilabi na sa pagsunod sa mga regulasyon sa trapiko, may nagakaigo nga penalidad nga mahimo ipatuman batok sa driver.
Ginpaathag man ni Abellar nga indi sa tanan nga sitwasyon ang operator ang direkta nga nagadesisyon sang penalidad nga ipatuman sa driver.
Apang, kon mahibaluan nga may kasal-anan man ang operator sa proseso sang pag-hire sang mga driver, mahimo man ini nga pasabton suno sa nagakaigo nga proseso.
Nahibaluan nga ini nga tikang sang ahensya kabahin sang pagpatuman sang mga regulasyon sa transportasyon kag pagpasiguro nga ang mga public utility vehicle nagasunod sa traffic rules and regulations para sa safety man sang mga nagagamit sang dalanon.
