Ginkwestyon ni Mr. Elmer Forro si Mr. Raymundo “Boyet” Parcon kun ngaa siya ang ginahangkat nga hingadlan ang mga kooperatiba nga wala man nagabyahe ang units apang nagabaton sang ayuda halin sa gobyerno.
Si Forro amo ang Lead Convenor sang NO to PUV Phaseout Coalition-Panay kag Secretary General sang Bayan Panay, samtang si Parcon naman amo ang chairman sang Western Visayas Transport Cooperative (WVTC).
Nag-ugat ini sang nagpahayag si Forro sa interview sang Bombo Radyo nga indi patas ang P20,000 nga subsidy sang Land Transportation Franchising and Regulatory Board (LTFRB) bangud nga modernized units lang ang nagabaton.
Nagsiling man ini nga indi patas ang programa sang gobyerno bangud nga madamo nga units sang modernized jeepneys ang wala man nagadalagan, apang may ayuda pa nga halin mismo sa pondo sang mga pumuluyo.
Nagsabat naman si Parcon nga tanan nila nga modernized units ang nagabyahe magluwas lang kun maguba kag kinahanglan nga i-repair kun weekend.
Didto na kag nagsiling si Parcon nga dapat nga imensyonar ni Forro kun sin-o nga mga kooperatiba ang iya buot silingon nga wala nagabyahe apang nagabaton sang ayuda.
Sabat naman ni Forro, sa baylo nga siya ang hangkaton, dapat nga ang LTFRB ang i-challenge nga siguruhon nga indi mauyang ang kwarta sang pumuluyo antes sila maghatag sang subsidiya.
Pahayag pa ni Forro, mas maayo man nga libuton na lang ang mga terminal agud nga mapamatud-an nga may mga kooperatiba nga wala nagabyahe ang iban nga units.
Nahibaluan nga naga-operate ang WVTC sang 95 ka mga modernized jeepneys sa Iloilo City nga nagabyahe halin sa mga terminal sa Mohon, Ungka, kag Tagbak pakadto sa City Proper.
Una na nga ginpahayag sang WVTC nga makabulig ang P20,000 per unit nga ayuda agud nga masustiner ang ila nga mga operasyon samtang sunod-sunod nga nagatimbuok ang presyo sang gatong.
