Nagahatag sang P20,000 nga financial assistance ang Land Transportation Franchising and Regulatory Board ukon LTFRB Region 6 sa mga kwalipikado nga modernized jeepney units agud mabuligan ang mga kooperatiba sa ila pagbayad sang amortization sa bangko.
Sa interview sang Bombo Radyo kay Atty. Maria Joscet Abellar, Chief Transportation Development Officer sang LTFRB-6, iya ginpahayag nga ini nga bulig ginpatuman bangud sa nagkalain-lain nga pagpanghangkat nga ginaatubang sang mga operators sang modernized units.
Ginklaro ni Atty. Abellar nga indi ini nagakahulugan nga ginabalewala sang LTFRB ang iban nga drivers nga nagabyahe paagi sa traditional nga units, kundi bangud indi man bastante ang budget para sa financial assistance.
Suno sa iya, may mga subsidy man nga ginhatag ang gobyerno sang nagligad sa mga operators kag drivers, kag nagapangita pa ang ahensya sang dugang nga pondo agud mas madamo pa ang mabuligan.
Ginpatpat man niya nga para makakuha sang assistance, kinahanglan nga may valid franchise, special permit ukon provisional authority ang unit.
Para naman sa mga kooperatiba, kinahanglan nga may certificate of good standing halin sa Transport Cooperative Office kag wala sang pending ukon ongoing cases.
Dugang pa ni Atty. Abelar, sa subong, wala pa sang unit nga nahatagan sang amo nga assistance, apang yara na sa mga 20 ka aplikasyon ang gin-forward sa Central Office para sa final evaluation kag preparation sang cheke.
