Liwat nga ginakonsiderar sang Miami Heat ang posibilidad nga makuha si National Basketball Association (NBA) star Kyrie Irving paagi sa trade.
Ginpaguwa ini sang insiders sang NBA matapos nga nakadaog na gid man sa una nga tion ang Miami Heat sa 2026-2027 season matapos ang lima ka hampang. Apisar sini, nagapabilin ang posibilidad nga kinahanglan pa sang team ang dugang nga player nga makapuntos kag makahimo sang opensa.
Suno kay NBA insider Shams Charania, gina-monitor sang Heat ang sitwasyon ni Irving, apang madamo man sang iban nga mga team ang interesado sa iya.
Dugang ni Charania, mahimo nga indi bastante ang isa lamang ka first-round draft pick nga mahimo itanyag sang Miami agud makuha si Irving, bangud posible nga mas mataas pa ang presyo nga pangayuon sang Dallas Mavericks.
Suno naman sa NBA insider nga si Jake Fischer, may mga nagalibot na nga impormasyon nga interesado ang Miami sa pagkuha kay Irving, nga mahimo mangin sentro sang mga trade negotiation antes ang Pebrero 11 nga trade deadline.
Mahimo nga i-upod sang Miami sa trade package ang kontrata nanday Andrew Wiggins kag Davion Mitchell, upod ang ila available nga first-round draft pick kag iban pa nga mga bata-on nga player.
Apang mahimo nga kinahanglan ang ikatatlo nga team sa transaksyon bangud sa limitasyon sa kadamuon sang mga player nga mahimo magpabilin sa roster sang Dallas Mavericks.
Lakip man sa mga team nga ginakabig nga posible nga makakuha kay Irving ang Houston Rockets kag Detroit Pistons, nga suno sa mga report may mas madamo nga draft assets nga mahimo itanyag.
Antes ini, nangin teammate ni Irving si Luka Doncic sa Dallas Mavericks, nga nakalab-ot sa 2024 NBA Finals.
Apang pagkatapos sang ila pagkalutos sa Finals, nag-agi ang team sa mga pagbag-o sa roster kag nag-atubang sang mga problema sa kadalag-an, samtang nag-recover naman si Irving halin sa iya napilas nga anterior cruciate ligament ukon ACL.
Sa subong nga season, nakahampang na si Irving sa apat ka match kag may average nga 18 puntos, 3.8 assists kag 3.3 rebounds kada hampang, nga may 49 porsyento nga field-goal shooting sa average nga 27 minutos nga game time.#
