Maga-atubangay ang Pilipinas kag ang China sa temprano nga bahin sang men’s basketball competition sa Asian Games nga hiwaton sa Nagoya, Japan sa Septyembre.
Pareho nga nabutang ang duha ka pungsod sa Group C kun sa diin yara man ang Bahrain kag Kazakhstan.
Ini ang pang-apat nga sunod-sunod nga edisyon sang tournament kun sa diin magasambuwa ang Gilas batok sa Chinese team.
Defending champion ang Philippine national team matapos nakuha ang maragtason nga gold medal sang 2023 sa Hangzhou, China. Ang amo nga kampyonato ang nagtapos sang 61-anyos nga paghulat sang Pilipinas sa gold medal sa men’s basketball sa nasambit nga quadrennial meet.
Sang amo nga edisyon, nag-atubangay ang China kag Pilipinas sa semifinals.
Sa pagpanguna sang naturalized player nga si Justin Brownlee, nalagas sang mga Pinoy ang 20 puntos nga abanse sang Chinese players tubtub nga naangkon ang 77-76 nga kadalag-an.
Balantayan ang basketball game sa Asian Games sa September 10-20. Una nga atubangon sang Gilas ang Bahrain sa Septyembre 11; ang Kazakhstan sa Septyembre 12; kag ang China sa Septyembre 14. Top two teams lamang sa tatlo ka grupo kag ang duha ka best third-placed teams ang magaabante sa quarterfinals.
Ginalantaw na nga indi makahampang para sa national team ang mainstays sa Japan B. League nga sanday Dwight Ramos kag AJ Edu kag halin sa Korean Basketball League nga sanday Kevin Quiambao kag Carl Tamayo bangud sang ila commitments sa ila nga mother clubs.#
