Wala sang nakita nga problema si defense counsel kag spokesperson Michael Poa bilang tagasuporta ni anay Vice President Leni Robredo ang isa ka miyembro sang legal team ni Vice President Sara Duterte para sa impeachment trial.
Ini matapos maglapta sa social media ang mga Facebook post ni defense lawyer Justin Gular nga nagapakita sang iya nga pagsuporta kay Robredo sadtong 2022 sa presidential elections.
Suno kay Poa, wala sang epekto ang personal nga political affiliation sang isa ka abogado sa ginatungdan sini nga responsibilidad.
Pahayag pa ni Poa, ginpakita lamang sini nga proffesional ang mga abogado sang bise presidente kag ginahimo lang nila ang ila nga trabaho nga wala sang may ginadampigan sa pulitika.
Ginpunto man niya nga tinutuyo sang defense team nga ipresentar ang mga kamatuoran kag pamatud-an nga wala sang basehan ang mga alegasyon batok kay Duterte sa impeachment proceedings.
Dugang pa ni Poa, wala man sang rason ang nasambit nga isyu agud makaangkon sang indi maayo nga kaangtanan sa sulod sang ila nga grupo.
Ginpahayag man sini nga kumpleto sa gihapon ang iya nga pagsalig sa abilidad kag dedikasyon sang kada miyembro sang defense team nga suno pa sa iya madugay na sini nga naupod sa trabaho sa sulod sang duwa ka tuig.
