Gin-insister ni Senator-Judge Robin Padilla nga dapat sundon sang Senate impeachment court ang Konstitusyon sa isyu sang 16-vote threshold sa impeachment trial ni Vice President Sara Duterte.
Ini matapos magpangayo sang klaripikasyon si Senator-Judge Erwin Tulfo kay presiding officer Chiz Escudero parte sa voting requirement bangod may mga senator-judges nga wala nagatambong sa trial.
Suno kay Padilla, nanumpa ang mga senator-judges nga tumanon kag protektahan ang Konstitusyon, gani indi ini dapat bali-on ukon likawan paagi sa pagdesisyon lamang sang impeachment court.
“Ang Constitution ay hindi po pwedeng galawin. Hindi natin pwedeng gawan ng paraan,” pahayag sini sa proceedings.
Ginsiling ni Padilla nga kon may pagbag-o sa Konstitusyon, dapat ini ipaagi sa nagakaigo nga proseso sang constitutional amendment.
Dugang pa niya, bisan indi mataas ang iya edukasyon kag bisan nakaagi siya preso, determinado siya nga panindugan ang Konstitusyon tubtob sa katapusan sang iya kabuhi.
“Ako po ay hindi nagmamagaling dito: Ako po ay ex-convict. Isa lang po ang gusto kong malaman po ninyong lahat. Hindi po ganyang kataas ang pinag-aralan ko. Pero ipaglalaban ko ang Konstitusyon na ito hanggang sa dulo ng aking buhay,” pahayag pa sini.
Nahibaluan nga nagdesisyon ang korte nga patigayunon sa Septyembre 23 ang oral arguments sang prosecution kag defense kaangot sa voting threshold nga kinahanglan para ma-convict ang respondent.
Antes ang oral arguments, pamatian anay sang korte sa Septyembre 16 ang mga amici curiae ukon “friends of the court” para maghatag sang opinyon kaangot sa amo nga isyu.#
