Ginatan-aw sang Iloilo City Government ang Jalaur Dam bilang alternatibo nga water source sa tion nga magkulang ang suplay sang water suppliers sa siyudad.
Suno kay General Services Office (GSO) Head Engineer Neil Ravena, magapakigsapol siya sa nagkalain-lain nga water suppliers, lakip ang South Balibago, MPIW kag iban pa, agud mahibaluan kung masiguro nila nga wala sang kakulangan sa ila water sources kag kung ano ang mahimo nga contingency measures kung magka-deficit.
Magapakigsapol man si Ravena sa National Irrigation Administration (NIA) bangud nagapati siya nga may yara ini sang impormasyon kung diin ang posible nga mga water sources nga mahimo mangin raw water supply sang mga water suppliers para sa distribusyon sa mga barangay.
Lakip man sa paga-istoryahan sa meeting ang Jalaur Dam nga ginakuhaan sang tubig sang isa sa mga suppliers, apang suno kay Ravena, indi na ini sakop sang jurisdiction sang siyudad.
Dugang pa ni Ravena, importante nga mahibaluan ang kalidad sang kada water source kag dapat may yara ini sang laboratory results agud mahibaluan ang nagakaigo nga water treatment.
Magaupod man sa meeting ang City Health Office (CHO) kag pagadiskusyonan ang water treatment advisory sang kada water district.
Ginpahayag man niya nga ang water sources nga gamiton sang siyudad paagi sa water tankers para lamang sa domestic use, samtang ang potable water kinahanglan maghalin sa water suppliers agud masiguro nga safe ini para sa konsumo.
Suno kay Ravena, kabahin ini sang early preparations bangud naganubo na ang precipitation kag kinahanglan masiguro sang siyudad nga may yara sang alternatibo nga suplay sang tubig antes pa mag-atubang sang kakulangan.
Ginalauman man nga magpagguwa ang Iloilo City Public Information Office (PIO) sang official report parte sa preparasyon agud mas maathag nga maplano ang response sang siyudad suno sa available nga logistics kag resources.
Text by: Bombo Cyrene A. Nais
