Temprano nga natapos ang kampanya ni Olympic bronze medalist Aira Villegas sa 20th Asian Games matapos siya malutos sa kamot ni Sakshi Chaudhary sang India sa imbukada sang women’s 51-kilogram division.
Napierdi si Villegas sa score nga 5-0 sa round of 32 nga ginhiwat sa Nishio Gymnasium sa Nagoya, Japan.
Si Villegas nga nangin flagbearer sang Pilipinas sa opening ceremony amo ang isa kuntani sa mga ginalauman nga makakuha sang medalya para sa pungsod.
Samtang, si Chaudhary amo ang reigning 51-kilogram gold medalist sa 2026 Commonwealth Games kag duha na ka beses nangin World Youth champion.
Gin-ako si Villegas nga nakaapekto sa iya ang mas mataas nga height ni Chaudhary nga 5 feet 5 inches, kumpara sa iya nga 5 feet 2 inches, apang pahayag niya, wala siya nagapangita sang palusot sa iya kapierdehan.
Matandaan nga nakakuha si Villegas sang bronze medal sa women’s 50-kilogram division sa 2024 Paris Olympics apang nalutos man sa first round sang 2022 Hangzhou Asian Games.
Bangud sini, lima na lang ka boksingero sang Pilipinas ang nabilin sa Asian Games, lakip sanday Olympic medalists Nesthy Petecio kag Carlo Paalam.
