Nakaabot na sa Pilipinas ang dugang pa gid nga 62 ka mga overseas Filipino workers (OFWs) halin Saudi Arabia.
Ini ang kabahin sang repatriation efforts sang gobyerno sa mga Pilipino sa Saudi Arabia samtang padayon ang flight disruptions kag tensyon sa Middle East.
Bangud sini nga bag-o nga batch, naglab-ot na sa 574 ang numero sang na-repatriate nga mga OFW halin sa amo nga pungsod.
Suno kay Department of Migrant Workers (DMW) Secretary Hans Leo Cacdac, nagdugay sa halos tatlo ka semana nga na-stranded ang ulihi nga mga Pinoy bangud sang pag-suspend sang flights halin Riyadh pakadto Manila sa King Khalid International Airport.
Ginalauman nga 500 pa ka mga OFW ang mapauli sa masunod pa nga 4-5 ka mga inadlaw.
“Lalagpas tayo ng 1,000 within the next four to five days,” dugang sini.
Nahibaluan nga naghatag ang DMW sang financial assistance sa 3,900 ka mga Pinoy sa Saudi halin sang nag-umpisa ang nga mga disruption sang Oktubre 10.
Sa sini nga numero, 3,700 ang airport workers and employees nga apektado ang palangabuhian bangud sa tension.
Ginpahayag nga pagabuligan man sang gobyerno ang mga OFW paagi sa koordinasyon sa Technical Education and Skills Development Authority (TESDA) agud nga makapangita sang bag-o nga obra paagi sa pag-base sa ila skills profiling kag job matching.
