Ginpabaskog pa sang Houthi rebels ang ila pag-atake batok sa Saudi Arabia lakip ang pagpalupad sang mga missile pakadto sa Riyadh airport kag mga pasilidad sang enerhiya.
Suno sa grupo, gin-target nila ang Riyadh airport kag ginpaandaman ang mga empleyado nga magpalayo sa mga energy facility bangud posible man ini nga atakehon.
Tatlo na ka tawo ang gin-report nga napatay sini nga semana bangud sa mga pag-atake sa Riyadh airport kag Abha airport.
Samtang, daku nga halit ang nabilin sa isa ka eroplano sang Saudi state carrier nga Saudia Airlines matapos naigu sang shrapnel kag nasunog samtang naka-park sa terminal sang Riyadh airport.
Wala sang pasahero nga sakay sa eroplano sang natabo ang insidente apang wala pa makumpirmar kon may nasamaran.
Ginpahayag man sang Saudi authorities nga ang mga debris halin sa missile nga na-intercept nagtupa sa isa ka kindergarten kag medical complex sa Riyadh.
Bangud sa mga pag-atake, gin-suspend sang Lufthansa kag Air India ang ila mga flight pakadto sa Riyadh, samtang madamo nga flights sa Riyadh airport ang nakansela ukon na-delay.
Suno sa Houthi rebels, ang ila mga pag-atake amo ang sabat sa suporta sang Saudi Arabia sa internationally recognized government forces sa Yemen nga liwat nagapakig-away batok sa grupo.
Samtang, ginpahayag sang Saudi-led coalition nga naigu nila ang duha ka ballistic missiles nga ginpalupad pakadto sa Riyadh kag isa pa ka missile nga pakadto sa Khamis Mushayt.
Nagapangayo naman sang suporta ang Saudi Arabia sa mga kaalyado nga pungsod samtang ginatinguhaan sini nga mapunggan ang paglapta sang kontrol sang Houthis sa southwest Yemen.
