Wala sang Pilipino nga naapektuhan kasunod sang missile attack sang Iran-backed Houthis sa Riyadh, Saudi Arabia.
Suno ini sa latest update sang Department of Migrant Workers (DMW) nga nagdugang nga padayon nila nga gina-monitor ang kahimtangan sang mga Pilipino sa amo nga pungsod.
Ginpanugyanan man ang mga overseas Filipino workers nga maghalong kag magsunod sa mga pahibalo kag mando sang Saudi authorities.
Ini ang una nga pag-atake sang Houthis sa Riyadh halin sang nagbalik ang conflict sa Yemen.
Ang Houthis nagakontrol sang daku nga bahin sang Yemen kag nagapakig-away sa mga pwersa sang gobyerno nga ginasuportahan sang coalition nga ginapangunahan sang Riyadh.
Sang Sabado, mabaskog nga mga pagpasigabong ang nabatian sa Saudi capital, samtang nakita ang isa ka fuel tank nga may logo sang oil giant nga Aramco nga ginalamon sang kalayo malapit sa airport.
Nagpahanumdom naman ang US State Department nga posible nga maglala pa ang military conflict kag gin-abisuhan ang mga American citizens sa gwa sang Middle East nga hunahunaon sing maayo ang pagbiyahe pakadto ukon pag-agi sa rehiyon.
Gin-restrict man sang US State Department ang pagbiyahe sang mga empleyado sang gobyerno sang Estados Unidos pakadto sa mga syudad sang Taif kag Yanbu sa Saudi Arabia.#
