Ginahanda na sang Iloilo City Government ang executive order nga basehan sang guidelines sa pag-atubang sang mataas nga heat index.
Suno kay Iloilo City Mayor Raisa Treñas, naglab-ot sa 43 degrees Celsius sang nagligad nga semana ang forecasted heat index, apang wala ini aktuwal nga naglab-ot sa amo nga temperatura.
Ginalauman nga ma-finalize na subong nga adlaw ang executive order agud mahimo man mangin giya sang Department of Education (DepEd) kag Commission on Higher Education (CHED) sa pagpatuman sang nagakaigo nga tikang sa mga eskwelahan.
Samtang, kabahin man sang mas malapad nga preparasyon sang Iloilo City sa El Niño ang pagpasangkad sang paggamit sang Bantay Iloilo City website bilang digital risk governance platform.
Suno naman kay Mr. Darwin Papa Emergency Response Division Chief sang Iloilo City Disaster Risk Reduction and Management Office (CDRRMO), kabahin ini sang direksyon ni Treñas nga mas gamiton ang digital technology sa paghatag sang impormasyon kag serbisyo sa publiko.
Ang Bantay Iloilo City isa ka web-based civic information and monitoring platform nga gin-develop sang Data Assessment and Systems Management Office (DASMO), nga nagatipon sang importante nga impormasyon tuhoy sa siyudad sa isa ka digital dashboard.
Paagi sa platform, ma-access sang publiko ang weather forecasts, heat index, rainfall, air quality, earthquake kag typhoon monitoring, traffic conditions, presyo sang mga balaklon kag gatong, public health information, kag mga abiso tuhoy sa power kag water interruptions.
Dugang pa ni Papa, ginaplano nga dugangan ang monitoring features sini, lakip ang current kag projected heat index, availability sang suplay sang tubig kag kuryente, scheduled brownouts kag lokasyon sang mga cooling hubs.
Mahimo ma-access sang publiko ang Bantay Iloilo City paagi sa [https://bantay.iloilocity.app/].
Text by: Bombo Cyrene A. Nasis
