Nakahanda na ang Iloilo Police Provincial Office (IPPO) para sa palaabuton nga Pista Minatay sa Nobyembre.
Sa interview sang Bombo Radyo kay Police Lt. Colonel Arnel Solis, spokesperson sang IPPO, iya ginpahayag nga kaangay sa nakaandan, ipasaka sa full alert status ang hanay sang kapulisan nga nagakahulugan nga tanan sila ang maga-duty.
Suno kay Solis, mangin prayoridad sang deployment ang mga patyo, simbahan, terminal, mga highway, kag iban pa nga lugar nga kinahanglan bantayan.
Pahayag sini, himuon ang pagbantay sang kapulisan nga may hugot nga koordinasyon sa local government units, Bureau of Fire Protection (BFP), kag volunteer groups nga kada tuig man nga nagabulig sa Philippine National Police (PNP) sa seguridad antes, kadungan, kag pagkatapos sang All Saints’ kag All Souls’ Day.
Nagpahanumdom man si Solis sa publiko nga mag-doble halong sa mga kawatan kag iban pa nga kriminal ilabi na bangud ginabayaan ang mga balay kag ginabisitahan ang mga patyo.
Kun yara naman sa sementeryo, ginapanawagan sa publiko nga maglikaw sa sa pagdala sang matalom nga mga hinganiban, ilimnon, droga, sound system, kag iban pa nga mga bagay nga makadisturbo sa iban.
Ginapangabay man sang IPPO sa mga pumuluyo nga likawan ang pagdala kag pagpakita-kita sang malahahon nga mga alahas ukon iban pa nga bagay agud nga makalikaw sa mga kawatan.
