Patay ang 22 ka tawo matapos magluntad ang sunog sa pito-ka-panalgan nga building sa Jakarta, Indonesia, subong nga adlaw Disyembre 9, 2025.
Suno sa Central Jakarta Police, nagikan ang kalayo sa naglupok nga battery sang isa ka drone kag naglapta tubtob nakalab-ot sa ikapito nga panalgan sang building.
Ang building amo ang opisina sang Terra Drone Indonesia, isa ka drone services para sa aerial survey sa sektor sang mina kag agrikultura sa Indonesia.
Sang natabo ang insidente, may pila pa ka mga empleyado ang nagakaon samtang ang iban gilayon nga nakaguwa sa building.
Apang, sa wala ginalauman patay gid ang 22 ka mga indibidwal bangud sa pagka-trap kag suffocation.
Nagpangayo naman sang pasaylo ang Terra Drone Co kag ila paga-imbestigaran ang natabo nga sunog.
Nahibaluan nga ini nga sunog natabo duha ka semana matapos ang lapnagon nga sunog sa Hong Kong kun sa diin 160 ka tawo ang napatay.
