Ginkumpirma ni House Secretary General Reginald Velasco nga beripikado na ang tatlo ka impeachment complaints batok kay Vice President Sara Duterte kag handa na nga ipasa sa opisina ni House Speaker Martin Romualdez sa bisan ano nga oras.
Apang suno kay Velasco, gusto sini hatagan sang tyempo ang iban nga mga mamalidha tubtub sa masunod nga semana agud nga maka-desisyon kun may ipalagas pa nga ikaapat nga complaint ukon iendorso nila ang tatlo ka existing complaints.
Kun may hingyo man ang iban nga kongresista nga kinahanglan pa ang dugang nga tyempo, ginpahayag ni Velasco nga diskusyunan anay nila ini kaupod sa House leaders.
“Next week will be the time, the right time to transmit it to the Speaker. But again, I will have to talk individually with the House members kung they have made already a decision. I have to respect my commitment to them…. I’ll have to talk with the House members na nag-request sa akin ng time to study the three complaints or consider filing another complaint, a new complaint,” pahayag ni Velasco.
Ginpanginwala man sang House Secretary General nga ginapabuyan-buyanan sini ang impeachment complaints. Ang iya paghulat suno sa iya ang nag-ugat sa request sang madamo nga kongresista.
Naka-break man ang Kongreso halin sang Disyembre 21 kag maga-resume sang session sa masunod nga semana.
“Alam mo the House of Representatives cannot act on it until magkaroon ng session which is January 13. So wala rin gagawin ang House kung on break pa sila. Wala namang mapapala kung i-transmit ko kaagad kung wala pa rin session. Walang metro eh. Kasi nakalagay sa rules, 10 session days ang Speaker,” dugang sini.
Base sa recent Social Weather Stations survey, 4 sa 10 Filipinos ang nagasuporta sa pag-impeach kay Vice President Duterte samtang nakasaad naman sa Pulse Asia survey nga mayorya sang mga Pinoy ang nagasuporta sa imbestigasyon sang House Quad Comm sa ginaalegar nga extra-judicial killings sa idalom sang administrasyon ni anay President Rodrigo Duterte.
Una naman nga gin-insister ni Sara nga pagpang-harass ini sa pulitika bangud ginakabig siya nga threat sa 2028 presidential elections.
