Ginduso ni House Majority Leader Sandro Marcos ang isa ka hagna agud nga indi maswelduhan ang mga myembro sang Kongreso kun indi sila mag-trabaho.
Gin-file sang Enero 27, 2026 ang House Bill 7432 ukon ang ginaproponer nga “No Work, No Pay for Members of Congress Act.”
Nakabutang sa coverage sini nga sakop sini ang tanan nga myembro sang Kongreso — buot silingon, ang mga yara sa Senado kag Kamara.
Sa explanatory note sang kongresista, ginpahayag sini nga ginasunod ang “no work, no pay” nga patakaran sa tanan nga mamumugon sa pungsod. Apang ginmuno niya nga ang mga myembro nga Kongreso — nga amo ang may katungdanan nga magbalay sang layi kag mag-represent sang mga tawo — ang gina-swelduhan sa gihapon apisar nga may attendance man sila ukon wala.
Suno sa kongresista, uyang ini sa kuwarta sang pumuluyo nga nagabayad sang buwis.
“This has led to public concern over absenteeism, lack of accountability and wastage of taxpayer funds,” pahayag sang presidential son.
Kun mapasar ini nga hagna suno pa kay Rep. Marcos, mas ma-promote ang transparency, accountability, kag integridad sa pang-gobyerno.
Gindugang sini nga naka-provide sa iya nga ginaduso nga hagna ang “safeguards” sa valid nga mga rason sa pag-absent kaangay sang balatian ukon official representation duties.
Wala sang ginhingadlan sa explanatory note ni Marcos, apang ang pinakamatunog nga kontrobersiya nga kaangot sini nga isyu sang damlag lang amo si Senator Ronald “Bato” Dela Rosa.
Madamo ang nagpakamalaot sa sistema bangud apisar wala nagapakita si Dela Rosa halin sang Nobyembre 2025, nagabaton gihapon siya sang sweldo.
Nag-umpisa sa pag-absent si Dela Rosa sa mga session sang Senado halin sang naggwa ang impormasyon halin kay Ombudsman Jesus Crispin “Boying” Remulla nga naka-isyu na ang International Criminal Court (ICC) sang arrest warrant batok kay Dela Rosa nga amo ang PNP chief sang ginpatuman ang drug war.#
